OZAMIZ CITY—Human sa taas nga panahon sa panaglantugi sa korte, gitugutan sa hukmanan ang petition sa abogado ni Ricardo Uy Jr., alias “Boy Halap” nga ibalhin ang custody niini ngadto sa Ozamiz City Reformatory Center (OCRC) gikan sa Provincial Jail sa Oroquieta City.
Misulti si Ricarte Gorospe, legal researcher ni Atty. Manelinio Apiag, kinsa maoy abogado ni Uy nga nakakuha na siya ug courte order sa transfer sa ilang kliyente niadtong Hunyo 12.
Nakigkita si Gorospe kang J/SInsp. Guy Jason Reyes, warden sa OCRC, ug iyang gihatag ang court order nga gipirmihan ni Judge Edmundo Pintac, presiding judge sa RTC-15.
Sumala pa ni Apiag, walay jurisdiction ang Provincial Jail sa kaso ni Uy apan gibutang lamang ang suspect didto gumikan sa kadaghan nga mga reklamo batok kang Uy.
Una niini, makadaghang higayon nga gi-deny sa korte ang petition sa mga abogado ni Uy alang sa iyang pagbalhin sa katarungan nga nahadlok ang korte nga basin ug makalayas si Uy gikan sa bilangguan sanglit giila siya nga usa ka high risk criminal basi sa record nga gikuptan sa PNP.
Si Uy, kinsa giingong usa ka druglord, nag-atubang sa kasong violation of RA 9165 ug laing tulo ka kaso sa pagpatay.
Na-dismiss na ang duha ka kasong pagpatay nga gipasaka sa pamilyang Ozamiz ngadto kang Uy samtang nagpabilin ang usa ka kasong murder nga gipasaka sa pamilya ni PO1 Renzfold Gamotin kinsay si Uy maoy suspek sa pagpatay niini. RONDA BALITA