JOE MENDOZA
Aurora News Desk
AURORA, ZAMBOSUR—Bisan og kulang sa suporta sa mga kapitanes, gidayeg ni Provincial Director Hadji Abcede Asjali sa DILG ang Municipal Development Council (MDC) nga gimugna ni Mayor Enrique Cabahug Jr.
Ang MDC, matod pa ni Cabahug, iyang gisunod sa Local Government Code of 1991 diin sa giingon didto nga local special bodies, ang matag lokal nga kagamhanan magmugna og local development council.
Mopailalom sa maong council ang tanang punong barangay, kagawad nga naghupot sa committee on appropriation, kongresman o iyang representante ug usa ka taga NGO nga accredited sa lungsod.
Ang gitukod ni Cabahug nga MDC adunay binulan nga tigom nga gibansagan og “Ugnayan.”
Ang mga gimbuhaton sa MDC mao ang paghulma og mga long and medium term plans, apil na ang annual socio-economic development plans og polisiya, ang annual public investment program.
Sa nakalabayng tigom sa MDC, giduso ang proposed 2009 Annual Investment Plan (AIP) nga pundohan sa 20 percent development fund nga mokabat P14,938,642.40.
Matod pa, gikauyonan sa MDC nga walay bisan usa nga misupak og andam kaning pa aprobahan sa mga Sangguniang Bayan members aron mahulma ang resolusyon o ordinansa.
Pipila sa mga gastuhan sa 20 percent development fund mao ang loan amortization of municipal hall nga P2,986,289.23; socialized housing program (Gawad Kalinga), P100,000; municipal peace and order Program and MUCLIA P300,000; municipal streets, barangay roads and bridges and Infres, P8,000,000.
Apil niini ang loan amortization sa Infres loan alang sa nasugdan nga proyekto sa farm-to-market roads ug water system ug P25,000 alang sa operation sa MDC ug galastuhan sa umaabot nga “Report to the People” sa unang quarter sa sunod tuig.
Ingon si Cabahug nga katungdanan sa mga miyembro sa MDC nga motambong sila sa binulang tigom aron masayod ang katawhan ngadto sa ilang mga barangay ug ginsakpan kon unsay gikasabutan ug gikauyonan.
Midugang si Cabahug sa pag-ingon nga aduna pa gihapoy mga kapitanes nga wala magtambongan sa “Ugnayan” bisan og gipasabot na sila sa katuyuan niini.
Ginganlan ni Cabahug sila si Anastacio Rondrique sa Bag-ong Oslob, Antonio Tariman sa San Juan, Allan Godoy sa Poblacion ug Mario Perez sa Alegria ang mga kapitan nga dili tigtambongan sa “Ugnayan.”
Ang ubang mga kapitanes, dugang sulti sa mayor, magpadala lang og representante sa “Ugnayan.”