BHEBS NACUA GULAHAB
Lanao news desk
KOLAMBOGAN, LND—Nasakote ang usa ka Polis sa Balo-I human siya makuhai ug pipila ka shabu sachets ug paraphernalia didto mismo sa iyang panimalay, Hulyo 23.
Giila ang polis nga si SPO1 Nestor Kilat, taga-Purok-7, Poblacion ug kasamtangang nadestino sa Balo-I Municipal Police Station.
Aduna na diay warrant of arrest nga gipakanaug batok niya, giisyu ni Judge Mamendiara Mangutara sa LDN-12 Judicial Region, Branch 1, Iligan City.
Sila si P/Insp. Elmer Feliciano Rubas, SPO2 Rolando Baguio, PNP Operational trust ‘Sangbanat’ ug mga miyembro sa PDEA nga sila si SPO2 Diosdado Cabahug, SPO2 Edgar Englatera ug PNP Operational trust ‘Sangbanat’ ang mi-raid ug midakop ni Kilat.
Naa nakuha ang siyam ka mga shabu sachets sa bulsa sa shortpants ni Kilat, ug aduna pay 20 kabuok ang nakuha sulod sa iyang kwarto, ilalom sa iyang higdaanan.
Gisumada sa polis nga motimbang ug 0.29 grams ug mokantidad sa kinatibuk-ang P5,220.
Naaktohan sad sa polis ang laing lima ka mga adik nga nag-pot session.
Giila sila nga si Destre Malifer, Jake Filomeno, Sadam Palmian, Samsodin Ampaso ug Madid Diongcat.
Gidala sila si Kilat ug ang lima ka nagbagnos didto sa Tipanoy Iligan City alang sa dugang imbestigasyon ug tukmang disposisyon.