MOLAVE, ZAMBOSUR--Tangkod nang miabot sa 60 ka tuig kining maong lungsod sukad mahimugso niadtong Hunyo 16, 1948 ilalom sa RA 296 nga gipangamahanan ni kanhi kongresista Juan Alano.
Hisayran nga usa ka dakong kasaulogan ang gihimo niadtong nakalabayang Lunes, ug gawas nga nagmalamposon, nahimo pa kining mabulokon.
Pasado alas 7:00 sa buntag, pormal nga gibuksan ang selebrasyon pinaagi sa usa ka dakong parada nga gilangkoban sa mga kawani sa munisipyo, pinangunahan ni Mayor Flavio Saniel ug Vice Mayor Ireneo Glepa.
Nagsunod kanila ang mga magtutudlo ug tinun-an sa nagkadaiyang eskwelahan sa hayskul, mga NGO ug daghan pang uban.
Misangko ang maong parada sa Molave Regn’l Pilot School (MRPS) Grandstand.
Gisunod gilayon ang program proper, diin gipabati ni Saniel ang iyang State of the Town Address, diin gihisgutan niya ug gilakbit-saysay kon unsa ang Molave kaniadto, karon ug sa umaabot nga mga panahon.
Wala makatambong si Gob. Aurora Cerilles apan atoa si provincial administrator Pepito Degamo, kinsa mi-reperesenta kaniya.
Pagkahapon, nagkadaiyang kalingawan ang gihimo, sama sa Motocross competition, lumba sa kabayo, sikad-sikad, lumba ug kaon sa sili, karambola sa manok ug dinakpanay sa baktin.
Sa maong adlaw, aduna say gihimo nga mobile passporting, diin gidagsaan kini sa kapid-an ka mga aplikante sa maong lungsod ug sa silingang dapit.
Ang Molave karon usa ka trading center sa Salug Valley Area. ROGER GULAHAB