TANGKAL, LDN—gisuklan nila ni Brgy. chairman Mawi Angni ug mga CVO ang usa ka grupo nga tigkawat sa mga baka sa usa ka sinukliay ug bala niadtong Miyerkules sa buntag sa nakalabayng semana.
Naggubat ang duha ka grupo didto sa may Brgy. Small Meladoc, ning lungsod.
Giadto pod dayon sa kapolisan ang maong lugar, sila si SPO3 Ali Bacarat, OIC COP, aron mohimo ug re-enforcement apan nakabiya nga ang mga kawatan ngadto sa kalasangang bahin sa Munai.
Sa pasiunang pakisusi nga gihimo sa mga kapolisan, hisayran nga nangaigo ang ubang kuyog ni Angni apan wala ray kabalak-an nga gamay ra ang samad.
Nakit-an sad didto sa dapit nahitaboan ang mga basiyo sa bala sa Ml4 rifle ug shotgun gauge 20.
Gipakatag na usab ni Bacarat ang iyang mga sakop aron sa paggukod sa mga malapason.
Samtang sa Lala, usa ka Honda XRM single motor nga gikatahong gikarnap ang nakuha pagbalik sa kapolisan niadtong Martes sa nakalabayng semana.
Saysay sa polis, mga alas 6:00 sa sayong gabii nahitabo ang pagpangarnap didto sa Brgy. San Isidro, Lala.
Human masayri ang maong hitabo, daling miresponde sila si P/SInsp. Rey Cabanas Alemanza, hepe, ug mga kauban ug gipahigayon ang usa ka pursuit operation ug tuod narecover ang motor nga naka rehistro sa ngalan sa usa ka Cresencio Benitez.
Ang nasangpit nga salakyanan, kasamtangang gideposito sa kuerpo sa kapolisan sa Maranding samtang padayon pa kining gihimoan ug dugang imbestigasyon. BHEBS NACUA GULAHAB