MOLAVE, ZAMBOSUR—Kamulo karong nangalap ug mga datos kalabot sa general revisions sa mga real properties sa mga magbubuhis alang sa sunod tuig ang Municipal Assessors Office.
Gibutyag ni Eduardo Bustamante, municipal assessor, nga ang labing ulahing revisions nga ilang gihimo kaniadto pang 2003 ug miepekto na gani pagkasunod tuig pa.
Gipasabot niya nga ang sentrong tumong ug katuyuan mao ang pag-update sa mga market values sa mga yuta o kabtangan sama sa edepisyo, makinarayas ug uban pang mga ginatawag nga improvements sulod sa maong gidugayon.
Ang collectible sa basic ug special education tax ning lungsod sa 2004 mikabat ngadto sa P6.8-milyones sa iyang assessed value nga P340-milyones.
Hisayran nga ang Molave galangkob sa 25 ka mga kabarangayan diin pinakadaghang lumulopyo anaa sa Maloloy-on, Madasigon ug Makugihon.
Ang probinsiya, matod pa ni Bustamante, naghatag ug 20 porsiyento diskwento sa mga taxpayers hangtod lamang Marso 31. ROGER GULAHAB