BONIFACIO, MISOC—Tungod sa kanihit sa mga utanon sa probinsiya, usa sa mga proyekto nga kasamtangang gihingusgan sa mga tag-as nga opisyal ning lalawigan mao ang pagpananom ug mga pang-commercial nga mga utanon.
Kini mao nasayran gikan ni board member Tito Decina sa programang “Kakugi ko, Kalamboan ko, Responsibilidad ko” sa radio DxMP nga iyang gidumala matag Sabado.
Kini nga programa gipangunahan ni Gob. Loreto Ocampos diin magasabwag ug mga maayong mga balita kalabot sa mga nagkadaiyang programa sa lalawigan ilabina sa programang pang-agrikultura diin si Decina maon\y chairman niini sa Sangguniang Panlalawigan.
Ingon si Decina nga sa tanang lungsod sa probinsiya, nakauna ang Bonifacio nga nakapa-implementar sa pagpananom ug mga utanon.
Ang maong lungsod adunay gidak-on nga 12 ka hektaryang luna sa yuta nga gitanoman ug utanon nga pang-commercial ug gani nga taud-taud na kining napahimuslan sa mga mag-uuma.
Dagko ug tambok kaayo ang ilang siling atsal, kamatis ug uban pang mga utanon ang nabaligya na sa mga nanag-iyang mga mag-uuma sa dinagkong pagtulod.
Gidugang pa sa maong opisyal nga kung madaghan na ang utanon dinhi, dili na makakompra ang lalawigan sa ngadto sa laing mga dapit sama sa Cagayan de Oro ug Bukidnon.
Alayon niini, buot sad ipaabot ni Decina nga kung kinsa ang buot mohimo ug commercial farming o commercial-type vegetable production, moduol lamang niya aron katabangan. BHEBS NACUA GULAHAB