REMAI ALEJADO
Online news contributor
PAGADIAN CITY: Gusto ni Gob. Aurora Cerilles nga mohatag sa hingpit nga ayuda ug kooperasyon sa tanang mga opisyal ug kawani sa kagamhanang probinsiyal alang sa dinaliang implementasyon sa mga nag-unang programa ug proyekto ilalom sa iyang administrasyon.
Mao kini ang hugtanong gipamulong sa gobernadora atol sa flag raising ceremony sa miaging adlaw human niya gipasalamatan ang tanang mga kawani sa pagpaluyo kaniya ug sa tanang mga kandidato sa NPC-KAMPI sa miaging piliay.
Gisulti ni Cerilles nga sa katapusan niyang termino, magbilin siya maayo sa probinsiya sa Zamboanga del Sur.
Gipangayo niya sa mga kawani ang dedikasyon ug lig-ong puwersa sa pangagamhanan nga mohatag og gahum kanila sa pagbuntog sa tanang mga babag aron ihatod ang mga kaayuhan sa katawhan.
Gdugang pa niya nga samtang gilatid nila ang mga strategic directions alang sa 2008 hangtod 2010, ang mga hiniusang lakang sa executive ug legislative department sa kapitolyo gitumong nila sa pagpadali sa implementasyon sa mga nag-unang programa ug mga proyekto sa Cerilles-Ariosa administration.
Kini atong mahimo pinaagi sa pagpalambo sa fiscal management ug pagpalagsik sa economic enterprise program nga kun hatagan sa tukmang atensiyon makadugang sa kita sa lalawigan, matod pa niya.