TANGUB CITY—Nakabsan sa kinabuhi ang tulo ka biktima sa pagpamusil human sila makaangkon ug daghang samad-pinusilan tumong sa nagkadaiyang parte sa ilang kalawasan.
Ang naasoyng pagpangluthang nahitabo niadtong Hulyo 24 sa udto sa Brgy. Mangga.
Human madawat ang maong balita, miadto dayon sa dapit nahitabo-an sila si SPO2 Luis Fermo, SPO2 Henie Arcadio, PO1 Abraham Momongan, PO3 Leozy Baid uban si P/CInsp. Cayetano Albarico.
Ang mga naigo mao sila si Levi ug Arnel Cube, mga tinun-an sa Northwestern Mindanao State College of Science and Technology. Uban nila si Jonjie Dagajas.
Gipusil silang tulo sulod sa panimalay ni Leve.
Sa mga pakisusi nga gihimo sa mga kapolisan, ilang hisayran nga magpanuko sa pagtug-an ang mga pipila nga nakakita sa maong panghitabo.
Apan, matod pa, duha ka mga armadong lalake nga nagsakay sa duha ka single motor niini ug pulos adunay mga backride, naka bonnet, ug daling mipunting sa ilang hinagiban ngadto sa tulo.
Siyam ka basiyo sa bala ang nakuha sa maong dapit. BHEBS NACUA GULAHAB